2025-2026 სასწ. წელს სასკოლო პროექტის თემად სკოლამ აირჩია კულტურული მემკვიდრეობის დაცვა - სახელწოდებით: “ჩვენი საგანძური". ამასთან დაკავშირებით, უცხოური ენების კლუბმა (ხელმძღვ: მ. დარჩაშვილი და ქ. ჩიქოვანი) დაგეგმა მსვლელობა ძველი თბილისის ერთ-ერთი უძველეს უბანში - ავლაბარში, მარშუტით: ფერისცველების მონასტერი - დარეჯანის სასახლე - დავით  მეფსალმუნის  ტაძარი - მეტეხის ეკლესია -  ასი ათასი მოწამის ხიდი - შარდენის     ქუჩა - სიონის ეკლესია.

აქტივობის მიზანი იყო  მოსწავლეების გიდის როლში ყოფნა და უცხოელი სტუმრების დაინტერესება ჩვენი ქალაქის წარსულით, მისი ისტორიით. მოსწავლეები ერთმანეთს ენაცვლებოდნენ: მოგვითხრობდნენ ინგლისურ და გერმანულ ენებზე.  საინერესო ფაქტებს იხსენებდნენ  ქართულადაც. მათ ძალზე საინტერესო ინფორმაცია ჰქონდათ მოძიებული ჩვენი უძველესი ეკლესიების, დარეჯანის სასახლის, შარდენის ქუჩის შესახებ. როგორც მოსწავლეებმა აღნიშნეს, ამ დღემდე ბევრი რამ არ იცოდნენ თავისი ქალაქის შესახებ.

ასე ჩაიწერა კიდევ ერთი ლამაზი დღე  კლუბის ისტორიაში.

სადამრიგებლო საათის ფარგლებში კლასთან შედგა გულწრფელი საუბარი - მოსწავლეებს კარგად აქვთ გაცნობიერებული, თუ რა ჩვევები არის საყურადღებო მათი ასაკის ბავშვებისათვის. როგორც აღნიშნეს, მათ ყოველდღიურად ინტერნეტსივრცეში სხვადასხვა „მაცდუნებელ“ ინფორმაციასთან გამკლავება უწევთ, რაც შესაძლოა მომავალში უარყოფიდად აისახოს მომავალ თაობაზე.
აქედან გამომდინარე, საუბარი შეეხო მოზარდებში ისეთი თვისებების გამომუშავებას, როგორიცაა ნებისყოფა, სიმტკიცე, ფიზიკური სიჯანსაღე და ა.შ.

თემა:  „მიგრაციები ძველად და ახლა“ (მასწავლებლები: ე. ბუცხრიკიძე (გეოგრაფია) და ი. გარსენიშვილი (ისტორია))

გაეროს  გადაწყვეტილებით  1990 წლიდან 18  დეკემბერი სახელდება   შრომით მიგრანტთა საერთაშორისო  დღედ.  სწორედ    მიგრაციის  თემას დაუკავშირდა დეკემბრის თვეში ისტორიის   და  გეოგრაფიის  მასწავლებლების მიერ X კლასში ჩატარებული ინტეგრირებული  გაკვეთილი   სახელწოდებით „მიგრაციები  ძველად   და ახლა“

სხვადასხვა ტიპის წყაროებზე  დაყრდნობით, მასწავლებლებმა და მოსწავლეებმა  მოახდინეს   პრეისტორიულ, ძველ აღმოსავლურ  და ანტიკურ პერიოდთან დაკავშირებული სოციალური და პოლიტიკური მოვლენებისა და პროცესების გაანალიზება, ფაქტებსა და მოვლენებს შორის მიზეზ-შედეგობრივი კავშირების დადგენა. წარმოაჩინეს საზოგადოების  განვითარების  ეტაპების  გავლენა  მიგრაციულ  პროცესებზე. ასევე  გააანალიზეს   საერთაშორისო  მიგრაციის  გლობალური  როლის გავლენა  როგორც ცალკეული  ქვეყნების, ისე  მსოფლიოს მეურნეობაზე, დემოგრაფიასა და გარემოზე.

მოსწავლეებმა საინტერესოდ  განიხილეს  საერთაშორისო  მიგრაციების   ყველაზე  გავრცელებული  ფორმები  და სახეები.  გაკვეთილის მსვლელობის  დროს  დაფასთან ერთად მიზნობრივად    გამოყნებული იყო   სხვადასხვა ელექტრონული  რესურსი,  სქემა,  ფოტო ,  ისტორიული თუ გეოგრაფიული  რუკა.

ყველა  დროის და ეპოქის  მნიშვნელოვანი  მოვლენის, მიგრაციის  განხილვამ, კიდევ ერთხელ  აჩვენა საგნობრივ  კათედრაზე შემავალ  ამ ორ  საგნის   შორის მჭიდრო  ურთიერთკავშირი.