2022 წლის 8 აპრილს სკოლის ბიბლიოთეკაში სამოქალაქო განათლების კლუბში VIII და IX კლასების მოსწავლეთა შეხვედრის თემა შეეხო არასრულწლოვანთა მიერ ჩადენილ დანაშაულს, მათ გამომწვევ და ხელისშემწყობ გარემოებებს. ისაუბრეს საზოგადოებისა და სახელმწოფოს როლზე. იმაზე, თუ რა უნდა გაკეთდეს დანაშაულის თავიდან აცილების მიზნით. განიხილეს მათთვის ცნობილი მაგალითები.
შეხვედრის დასასრულს მოსწავლეებმა გააკეთეს დასკვნები. ისაუბრეს იმ თვისებების გამომუშავების აუცილებლობაზე, რაც დაიცავს მოზარდს, რათა უნებლიედ დამნაშავედ არ ჩამოყალიბდეს.
შეხვედრას ესწრებოდნენ სამოქალაქო განათლების კლუბის ხელმძღვანელი (ქ-ნი ე. ბუცხრიკიძე) და სკოლის დირექციის წარმომადგენლები.
კომპლექსური შემაჯამებელი დავალება მუსიკაში VI კლასის მოსწავლეებმა წარმოადგინეს თემაზე - ხმოვანი კინო - მუსიკის როლი ხმოვან კინოში. დავალება ითვალისწინებდა მუსიკის შესაბამისობის დადგენას უხმოდ ნანახი ფილმების ფრაგმენტებთან, პოსტერის შექმნას და პრეზენტაციას.
პირველ ეტაპზე მოსწავლეები გაეცვნენ კომპლექსური დავალების არსსა და პირობას; პრეზენტაციის მახასიათებლებს. ხმოვან კინოსთან დაკავშირებული წინარე ცოდნის
გააქტიურების შემდეგ, მოსწავლეებმა იხილეს დოკუმენტური კადრები ინგლისელი კინორეჟისორის - სერ ალფრედ ჰიჩკოკის შესახებ და გაეცვნენ სასპენსის რაობას.
მეორე ეტაპზე მოსწავლეებმა რამდენჯერმე დაკვირვებით ნახეს ეპიზოდები ფილმებიდან - „ვერტიგო“ (რეჟისორი: ა. ჰიჩკოკი) და „გაღმა ნაპირი“ (რეჟისორი: გ. ოვაშვილი) მუსიკალური ფონის გარეშე და მოისმინეს მუსიკალური ფრაგმენტები, რასაც მოჰყვა მსჯელობა, განხილვა. ყურადღება გამახვილდა სამიზნე ცნებებსა და მკვიდრ წარმოდგენებზე.
კომპლექსური დავალების ბოლო ეტაპზე მოსწავლეებმა შექმნეს პოსტერები და პრეზენტაციით წარსდგნენ კლასის წინაშე. მოსწავლეებთა მუშაობა კომპლექსურ დავალებაზე მიმდინარეობდა დიდი დაკვირვებით, ყურადღება გამახვილდა ფილმის ნებისმიერ დეტალზე, მუსიკალური ენის ყველა ელემენტზე. ვფიქრობთ, ამგვარ დავალებებზე მუშაობა მართლაც რომ კომპლექსურად ავითარებს მოსწავლეთა აზროვნებას, ხედვას, ფანტაზიას, წერისა და მეტყველების კულტურას და ა.შ.
მოსწავლეთა თქმით, მათ არასოდეს უნახავთ ფილმი ასე გააზრებულად, ნანახსა და მოსმენილს შორის პარალელისა და შესაბამისობის ძიებით.
კომპლექსურ დავალებებზე მუშაობა ხელს უწყობს მოსწავლეთა ჰარმონიულ განვითარებას და შედეგები თანდათანობით უფრო თვალსაჩინო იქნება.
მოსწავლეთა გამოსვლას ყურადღებით უსმენდნენ მათი უმცროსი მეგობრები - III კლასის მოსწავლეები. თითოეულმა მათგანმა ისაუბრა იმ წიგნის შესახებ, რომელმაც მასზე დიდი შთაბეჭდილება მოახდინა და სურს თავისი მოსაზრებები სხვებსაც გაუზიაროს.
„ანა ფრანკის დღიური“, „უფლისწული და მათხოვარი“, „ბიძია თომას ქოხი“, „ჰელადოსი“, „არგონავტების მოგზაურობა კოლხეთში“ ...
მოსწავლეებმა ზუსტად გადმოსცეს ავტორთა ჩანაფიქრი, თითოეული ნაწარმოების აზრის. ისაუბრეს იმის შესახებ თუ რამ დააფიქრათ ისინი, რა განცდა დაეუფლათ, რა ისწავლეს, რა ემოციები აღეძრათ კითხვის დროს...
მათი საუბარი იყო გულწრფელი. ისიც კი გაგვიმხილეს, რომ ზოგიერთ მათგანს კითხვისას თვალზე ცრემლიც კი მოსდგომია...
ბავშვებმა საპრეზენტაციო თემები თავისი ნახატებითაც გააფორმეს. ისე, როგორც შეძლეს...
მადლობა ჩვენს მოსწავლეებს იმ დადებითი ემოციებისათვის, რომელიც მათი მონათხრობით იქ მყოფთ დაგვეუფლა.
მადლობა თინა მასწავლებელს, რომელმაც ბავშვებში ლიტერატურისადმი სიყვარულის მარცვალი გააღვივა.
„სამშობლო ჩემი გულის ფეთქვაა“ - ამ სახელწოდებით ჩაატარეს გაკვეთილი ქართულ ენასა და ლიტერატურაში VI კლასის მოსწავლეებმა (მასწ.: ირმა ალფაიძე). ისინი ესტუმრნენ მწერალთა და საზოგადო მოღვაწეთა მთაწმინდის პანთეონს. პატივი მიაგეს ჩვენი საამაყო მამულიშვილების საფლავებს.
წაიკითხეს ფრაგმენტები ილიას, აკაკის, გალაკტიონის, ნოდარ დუმბაძის, ანა კალანდაძის, გიორგი ლეონიძის ნაწარმოებებიდან. გაიხსენეს სხვადასხვა დროს შესწავლილი ლექსები და მოთხრობები...
გასვლით გაკვეთილს ესწრებოდნენ სკოლის დირექტორი ქ-ნი მარიამ დარჩაშვილი და პედაგოგ-ორგანიზატორი ქ-ნი ლალი ლამბრიანიძე.
მოსწავლეები წარუშლელი შთაბეჭდილებებით დაბრუნდნენ სკოლაში.საკონტაქტო ინფორმაცია
