გაცნობებთ, რომ განათლების სამინისტროს მიერ 2020 წლის 16 მარტს სკოლებში მოწოდებული რეკომენდაციების საფუძველზე, სკოლა „ივერონი“ დისტანციურ სწავლებას შეუდგა 2020 წლის 17 მარტიდან, რასაც წინ უსწრებდა არაერთი მოსამზადებელი სამუშაო.

ამ ეტაპზე სწავლება გულისხმობს მოსწავლეთა წინარე ცოდნის გააქტიურებას განვლილი მასალის გამეორების, გაღრმავების, დამატებითი შემეცნებითი აქტივობების გამოყენების საფუძველზე. ჩვენს მიერ მოწოდებულ 14 მარტის მიმართვაში დასახელებულია დავალებების ტიპები, რაც რეკომენდებულია  სამინისტროს  მიერ.

ასევე აღსანიშნავია ის, რომ სამინისტრო სკოლებს მოსწავლეებთან (ასევე მშობლებთან) სხვადასხვა საკომუნიკაციო ფორმებიდან  თავისუფლი არჩევანის საშუალებას აძლევს.  

აქედან გამომდინარე,  I-IV კლასების მოსწავლეებთან არჩეული გვაქვს კომუნიკაციის ერთ-ერთი ყველასათვის ადვილად ხელმისაწვდომი  ფორმა -  მშობელთა დახურული ფეისბუქჯგუფები, ვინაიდან ამ ასაკის მოსწავლეებისათვის განსაკუთრებით მნიშვნელოვანია მშობლების  ჩართულობა. დანარჩენ მოსწავლეებთან (IV კლასის ზევით) კი ურთიერთობა  ხორციელდება მოსწავლეთა ფეისბუქის დახურული მესინჯერჯგუფების  საშუალებით.

დღესდღეობით, მოსწავლე-მასწავლებლის ურთიერთობისათვის განსაზღვრული საათები არ არსებობს - კონტაქტი ხორციელდება მთელი დღის მანძილზე. ამ ჯგუფებში უკვე მე-3 დღეა, რაც მასწავლებლების მიერ იგზავნება დავალებები   და მოსწავლეთა ჩართულობაც სახეზეა. კვირის ბოლოს ყველა კლასის დამრიგებელი მოიპოვებს ინფორმაციას  მოსწავლეების მხრიდან ჩართულობისა და შესრულებული დავალებების შესახებ, რასაც ინდივიდუალურად გააცნობენ მშობლებს.

უდაოდ გასათვალისწინებელია ის ფაქტი, რომ ჩვენი სკოლის ზოგიერთი  მოსწავლე ოჯახთან ერთად ქალაქიდანაა გასული. ქვეყანაში არსებული მდგომარეობის გათვალისწინებით, მათ ამის ობიექტური მიზეზი გააჩნიათ, ეს მათი არჩევანია.

ქვეყნის მასშტაბით მიმდინარეობს სასწავლო სისტემის მოდიფიცირება, საგნობრივი პროგრამებისა და სასწავლო გეგმის გადაწყობა, რაც მორგებული უნდა იყოს სასწავლო დაწესებულების მიერ არჩეულ კომუნიკაციის ფორმებზე. პარალელურად, სკოლები - საჯაროც და კერძოც - სამინისტროდან ორშაბათისთვის (23 მარტისათვის) ელოდებიან ახალ რეკომენდაციებს, მითითებებს. რადიკალური ცვლილებები მოითხოვს გარკვეულ დროს.

მთელი სკოლა - დირექცია, კათედრები და მასწავლებლები უწყვეტ რეჟიმში (09:00 სთ-დან 24:00 სთ-მდე) მუშაობენ იმ პროგრამებზე, მეთოდებსა და მიდგომებზე, რომელთა საფუძველზეც იმედია სასწავლო პროცესი ნაყოფიერად  წარიმართება და ბოლომდე იქნება მიყვანილი.

დისტანციური სწავლება სიახლეა როგორც მასწავლებლებისათვის, ისე მოსწავლეებისათვისაც. ამიტომ მათთვის ამ სახის სწავლებაზე გადასვლა არ უნდა იყოს სტრესული. სწავლების პირველივე წუთებიდან მაღალი კლასების მოსწავლეები ამ პროცესში აქტიურად და დიდი ინტერესით არიან ჩართულები. დიდი მადლობა მათ ამ აქტიურობისათვის, ასეთი მაღალი თვითშეგნებისთვის!

დიდი მადლობა მშობლებს თანადგომისათვის!

პატივისცემით, სკოლის დირექცია.

19.03.2020 წელი

მშობელთა საყურადღებოდ!

იმისათვის, რომ მოსწავლეებს  უშუალო კონტაქტი ჰქონდეთ საგნის მასწავლებლებთან, მშობელთა თხოვნით, V კლასთან მუშაობა დღეიდან წარიმართება ისეთივე სახით, როგორც ეს ხორციელდება მაღალ კლასებში - ფეისბუქის მესინჯერჯგუფის დახმარებით.  

კვირაში მაქსიმუმ 2-ჯერ,   სავალდებულო საგნებში მოსწავლეებს მიეწოდებათ სხვადასხვა სახის დავალება. საჭიროების შემთხვევაში, მთელი დღის მანძილზე, ბავშვებს საშუალება ექნებათ იკონტაქტონ მასწავლებლებთან.

შესრულებული დავალების ფოტოს მოსწავლე დადებს იგივე ჯგუფში, ან   მასწავლებელს გადაუგზავნის პირად მესინჯერში (მოსწავლის სურვილის შესაბამისად), რის შესახებაც მოსწავლე  ჯგუფში აცნობებს საგნის მასწავლებელს (მაგ.: „ნანა მასწავლებელო, დავალება შევასრულე და გადმოგიგზავნეთ პირადში“). შესაძლოა მასწავლებელმა იქვე მიუთითოს მოსწავლეებს, რომ დავალება უნდა შესრულდეს რომელიმე კონკრეტული დღისთვის, ან დროისთვის, რაც მოსწავლისაგან ასევე გასათვალისწინებელი იქნება.

გისურვებთ წარმატებებს!

პატივისცემით, სკოლის დირექცია

19.03.2020 წელი

დაპირებისამებრ, გაგაცნობთ დისტანციური სწავლების ფორმასთან დაკავშირებულ იმ სიახლეებს, რომელიც შემოგვთავაზა განათლების სამინისტრომ.

ვინაიდან, 2020  წლის 02 მარტიდან 2020  წლის 01 აპრილამდე სკოლებში გამოცხადებულია             ს ა გ ა ზ ა ფ ხ უ ლ ო     ა რ დ ა დ ე გ ე ბ ი ,  ამიტომ ამ ეტაპზე განათლების სამინისტროს მითითებით, მოსწავლეების ინდივიდუალური საჭიროებიდან გამომდინარე, მასწავლებლისაგან (როგორც საგნობრივ ჭრილში, ასევე გამჭოლი კომპეტენციების გასავითარებლად) დავალებად მიეცემათ:

·         საკითხავი ლიტერატურა;

·         თემატური დავალებები

·         შემეცნებითი აქტივობები;

·         კვლევითი პროექტები;

·         და სხვა.

მოსწავლეებისათვის დავალებების  მიწოდება მოხდება ეტაპობრივად, კვირაში ერთხელ ან ორჯერ - საგნის სპეციფიკის გათვალისწინებით. დავალებები მიეცემათ ფაქტობრივად ყველა სავალდებულო საგანში.  

მშობლებისთვის შესაბამისი რეკომენდაციების მიწოდებისთვის გამოყენებული იქნება  მათთვის ხელსაყრელი ნებისმიერი საკომუნიკაციო ფორმა, მაგალითად:

·         სოციალური ქსელი;

·         ვიდეოზარები;

·         სატელეფონო კომუნიკაცია;

·         ელექტრონული ფოსტა;

·         და სხვა

საგნობრივ კათედრებზე გაერთიანებული მასწავლებლები ამჟამად  მუშაობენ სასწავლო პროგრამებზე, რომლის შესაბამისადაც სასწავლო პროცესი წარიმართება 2020 წლის 01 აპრილიდან.

დამატებითი კითხვების არსებობის შემთხვევაში დაუკავშირდით კლასის დამრიგებელს.

პატივისცემით, სკოლის დირექცია.

16.03.2020 წ.

ქვეყანაში არსებული მდგომარეობიდან გამომდინარე, საქართველოს  განათლების, მეცნიერების, კულტურისა და სპორტის მინისტრის

2020 წლის 11 მარტის ბრძანების თანახმად,   სკოლებში საგაზაფხულო არდადეგები 2019-2020 სასწავლო წლისთვის განისაზღვრა 2020 წლის 2 მარტიდან 2020 წლის 1 აპრილამდე.

როგორც განათლების მინისტრის მოადგილემ ქ-ნმა ეკა დგებუაძემ განაცხადა, ყველა საჯარო და კერძო სკოლას ორშაბათს (16 მარტს) გადაეგზავნება რეკომენდაციები. სკოლის დირექციას  აინტერესებს ასევე თქვენი მოსაზრებებიც. ჩვენი სამუშაო ჯგუფები განიხილავენ თქვენს შემოთავაზებებს და შევეცდებით შეძლებისდაგვარად გავითვალისწინოთ ისინი.

დამატებითი კითხვების არსებობის შემთხვევაში დაუკავშირდით კლასის დამრიგებელს, ან სასწავლო ნაწილის გამგეს (ტელ.: 599 97 96 99).

პატივისცემით, სკოლის დირექცია.

14.03.2020 წელი

2020  წლის 04 მარტს კერძო სკოლა „ივერონში“ ჩატარდა სადეზინფექციო სამუშაოები. სპეციალური ხსნარით  - „Lisoformin 3000“  (2%-იანი) - სრულად დამუშავდა სკოლის შენობა: საკლასო ოთახები, სამასწავლებლო, დერეფნები, კედლები, იატაკები, კიბის უჯრედები და მოაჯირები, სველი წერტილები, სამზარეულო და სასადილო დარბაზი, ბიბლიოთეკა, სპორტული დარბაზები, საგამოფენო დარბაზი; საკლასო ინვენტარი: მერხები, მაგიდები, სკამები, ფანჯრის რაფები, ფარდები, დაფები, კარის სახელურები, ელექტრო ჩამრთველები.

კვების ბლოკში ყველა ზედაპირისა და ჭურჭლის დამუშავება განხორციელდა „Lisoformin spezial”-ის  2%-იანი სხნარით.

სამუშაოები შეასრულა  შესაბამისმა სადეზინფექციო სამსახურმა ექიმი ეპიდემიოლოგისა და დეზინფექციონისტის ქ-ნი მადონა ჩხარტიშვილის ხელმძღვანელობით.