ყოველთვის გამორჩეულია კლასის დამრიგებლების ურთიერთობა  სადამრიგებლო  კლასის მოსწავლეებთან, მათ მშობლებთან.  სასწავლო წლის დასაწყისში დამრიგებლის სამუშაო გეგმასთან ერთად, იგეგმება „სადამრიგებლო საათზე“  სასაუბრო  თემები, სადაც გათვალისწინებულია  მოსწავლეთა ასაკობრივი ინტერესები და საკითხები.  „სადამრიგებლო საათი“ ტარდება ორკვირაში ერთხელ და ის  მნიშვნელოვანი კომპონენტია მოსწავლეთა აღზრდასთან დაკავშირებით.

„სადამრიგებლო საათზე“ მოსწავლეებს ეუფლებათ სრული  თავისუფლების შეგრძნება - გულახდილად საუბრობენ ნებისმიერ პრობლემაზე, ნებისმიერ საჭირბოროტო საკითხებზე, საუბრობენ იმაზე, რაც მათ ხშირად აწუხებთ ან ზოგადად აინტერესებთ. ამიტომ ზოგჯერ  სასაუბრო თემიდან გადახვევაც ხდება.  საუბრების დროს ყველა მოსწავლეს ეძლევა საშუალება გამოთქვას საკუთარი აზრი, შეხედულება,   ყურადღებით უსმენენ  და ზოგჯერ რჩევებსაც კი  აძლევენ ერთმანეთს.  საუბრის დასასრულს მოსწავლეები რამდენიმე კითხვას  წერილობით პასუხობენ და აფიქსირებენ საკუთარ მოსაზრებას.

2022 წლის 8 აპრილს სკოლის ბიბლიოთეკაში  სამოქალაქო განათლების კლუბში VIII  და  IX  კლასების მოსწავლეთა  შეხვედრის თემა შეეხო  არასრულწლოვანთა მიერ ჩადენილ დანაშაულს,  მათ გამომწვევ და ხელისშემწყობ გარემოებებს.  ისაუბრეს საზოგადოებისა და სახელმწოფოს როლზე. იმაზე, თუ რა უნდა გაკეთდეს დანაშაულის თავიდან აცილების მიზნით. განიხილეს მათთვის ცნობილი მაგალითები.

შეხვედრის დასასრულს მოსწავლეებმა გააკეთეს დასკვნები. ისაუბრეს იმ თვისებების გამომუშავების აუცილებლობაზე, რაც დაიცავს მოზარდს, რათა უნებლიედ დამნაშავედ არ ჩამოყალიბდეს.

კომპლექსური შემაჯამებელი დავალება მუსიკაში VI კლასის მოსწავლეებმა წარმოადგინეს თემაზე - ხმოვანი კინო - მუსიკის როლი ხმოვან კინოში. დავალება ითვალისწინებდა მუსიკის შესაბამისობის დადგენას  უხმოდ ნანახი ფილმების ფრაგმენტებთან, პოსტერის შექმნას და პრეზენტაციას.

პირველ ეტაპზე მოსწავლეები გაეცვნენ კომპლექსური დავალების  არსსა  და პირობას; პრეზენტაციის მახასიათებლებს.  ხმოვან კინოსთან დაკავშირებული  წინარე ცოდნის

გააქტიურების შემდეგ,   მოსწავლეებმა იხილეს დოკუმენტური კადრები  ინგლისელი კინორეჟისორის - სერ ალფრედ  ჰიჩკოკის შესახებ  და გაეცვნენ  სასპენსის რაობას.

მეორე ეტაპზე მოსწავლეებმა რამდენჯერმე დაკვირვებით ნახეს ეპიზოდები ფილმებიდან - „ვერტიგო“   (რეჟისორი: ა. ჰიჩკოკი)   და „გაღმა ნაპირი“  (რეჟისორი: გ. ოვაშვილი) მუსიკალური ფონის გარეშე და მოისმინეს მუსიკალური ფრაგმენტები,  რასაც მოჰყვა მსჯელობა, განხილვა. ყურადღება გამახვილდა სამიზნე ცნებებსა და მკვიდრ წარმოდგენებზე. 

კომპლექსური დავალების ბოლო ეტაპზე  მოსწავლეებმა შექმნეს პოსტერები და პრეზენტაციით წარსდგნენ  კლასის წინაშე.  მოსწავლეებთა მუშაობა კომპლექსურ დავალებაზე მიმდინარეობდა დიდი დაკვირვებით, ყურადღება გამახვილდა ფილმის ნებისმიერ დეტალზე, მუსიკალური ენის ყველა ელემენტზე. ვფიქრობთ, ამგვარ დავალებებზე მუშაობა მართლაც რომ კომპლექსურად ავითარებს მოსწავლეთა აზროვნებას, ხედვას, ფანტაზიას, წერისა და მეტყველების კულტურას და ა.შ.

მოსწავლეთა თქმით, მათ არასოდეს  უნახავთ ფილმი ასე გააზრებულად, ნანახსა და მოსმენილს შორის პარალელისა და შესაბამისობის ძიებით.