სასწავლო წლის დასასრულს, ჩვენი სკოლის VII-VIII-IX კლასების მოსწავლეები ესტუმრნენ მიხეილ თუმანიშვილის სახელობის კინომსახიობთა თეტრს სპექტაკლზე „ბაკულას ღორები“, რომელსაც საფუძვლად უდევს დ. კლდიაშვილის ნაწარმოები (დამდგმ. რეჟისორი – მიხეილ თუმანიშვილი; ინსცენირების ავტორი – ცოტნე ნაკაშიძე).
სპექტაკლში მონაწილეობდა ჩვენთვის საყვარელი არაერთი ცნობილი მსახიობი: რამაზ იოსელიანი, მზია არაბული, ლაურა რეხვიაშვილი, პაატა ბარათაშვილი, გიორგი ყიფშიძე, ზურაბ ყიფშიძე, ნინელი ჭანკვეტაძე, რუსუდან ბოლქვაძე, დარეჯან ჯოჯუა და სხვები.
ეს იყო ამ სპექტაკლის საიუბილეო ჩვენება. ამასთან ერთად, სპექტაკლის დასასრულს თეატრალურმა დასმა საზეიმოდ მიულოცა იუბილე ბ-ნ ცოტნე ნაკაშიძეს, რომელსაც იმ დღეს 80 წელი შეუსრულდა.
მადლობა სკოლის ადმინისტრაციას, ვისი ხელშეწყობითაც განხორციელდა თეატრში სტუმრობა და რაღა თქმა უნდა მადლობა თეატრის დირექტორს, ბატონ ჯაბა-ლევან მჭედელაძეს, რომლის დახმარებითაც ჩვენი სკოლის მოსწავლეებსა და მასწავლებლებს საშუალება მიეცათ დასწრებოდნენ სპექტაკლს და სცენაზე პირისპირ ეხილათ ცნობილი ქართველი მსახიობები.
2024 წლის 22 მაისს ზ. ფალიაშვილის სახელობის ოპერისა და ბალეტის აკადემიურ თეატრში ჩატარდა ლადო ათანელის კონცერტი, რომელიც მიეძღვნა მსოფლიო საოპერო სცენაზე მისი მოღვაწეობის 35 წლის იუბილეს.
სკოლა „ივერონის“ დამფუძნებელი - ქალბატონი ციცო ჯაფარიძე გახლავთ ლადო ათანელის საერთაშორისო საქველმოქმედო ფონდის თავმჯდომარე. ქალბატონმა ციცომ ჩვენი სკოლის პედაგოგ-თანამშრომლები მიიწვია ამ არაჩვეულებრივ კონცერტზე, რისთვისაც მას დიდ მადლობას ვუხდით.
სკოლა „ივერონის“ IX კლასის მოსწავლეებმა ქართულ ენასა და ლიტერატურაში წარმოადგინეს მათ მიერ შედგენილი პოეტური კრებულების ანთოლოგია თემაზე: „ლექსი ერთი რამ არის ამ სოფლის საქმეში“ (მასწავლებელი: თინა ჩხეიძე). მოსწავლეებმა კრებულებში თავი მოუყარეს სხვადასხვა თემატიკის ლექსებს. თითოეულ ლექსს თან ერთვოდა ავტორის შესახებ მოკლე ბიოგრაფიული ცნობები და სალექსო სტრუქტურის დახასიათება. მოსწავლეებმა ისაუბრეს, თუ რა ნიშნით შეარჩიეს ლექსები თავისი პოეტური კრებულისათვის და წაგვიკითხეს რჩეული და მათთვის საყვარელი ლექსები.
ეს იყო IX კლასთან გატარებული პოეზიის საოცარი 45 წუთი.
სკოლა „ივერონის“ IXკლასის მოსწავლეებმა 27 მაისს მოაწყვეს პრეზენტაცია თემაზე: „ტერორიზმი - თანამედროვე მსოფლიოს ერთ-ერთი რთული გამოწვევა“ .
როგორც ცნობილია, მსოფლიოში განვითარებული გლობალური კრიზისები გამოწვეულია მცდარი ფინანსური ან ეკონომიკური საქმიანობით, პანდემიით, სამხედრო კონფლიქტებით, ტერორიზმით. ეს უკანასკნელი მოვლენა მსოფლიოს ერთ-ერთი ყველაზე რთული გამოწვევაა. ზოგჯერ მას „არატრადიციულ ომად“ მოიხსენიებენ, რადგან დარღვეულია ომის ყოველგვარი წესი: არ არსებობს არც ფრონტი, არც საზღვრები, ომი მიმდინარეობს გამოცხადების გარეშე, არ განირჩევიან სამხედროები მშვიდობიანი მოსახლეობისგან. ტერორისტული აქტები შიშსა და შფოთვას თესავენ მოსახლეობაში. ჩვენი ქვეყნისთვის სასიცოცხლოდ მნიშვნელოვანია ტერორისტული საქმიანობის პრევენცია და აღკვეთა.
მოსწავლეებმა ისაუბრეს ტერორიზმის წარმოშობაზე, მისგან მომდინარე საშიშროებაზე, მოიყვანეს მაგალითები მსოფლიოში მომხდარ ტერორისტულ აქტებზე. პრეზენტაციისას წარმოადგინეს შესაბამისი ვიზუალური მასალა; მათ დაგმეს ტერორიზმი და გამოთქვეს საკუთარი მოსაზრებები, როგორ შეიძლება ებრძოლონ მას.საკონტაქტო ინფორმაცია
