2022 წლის 01 ნოემბერს წიგნისმოყვარუთა კლუბში VI კლასის მოსწავლეები შეხვდნენ მწერალ ნუგზარ ხუციშვილს, რომელიც ჩვენი სკოლის მოსწავლის - ვანიკო ხაჭაპურიძის პაპაა. ბ-ნი ნუგზარი გახლავთ მწერალთა კავშირის წევრი. მან ჩვენი მოსწავლეებისათვის მოიტანა და სკოლის ბიბლიოთეკას საჩუქრად გადასცა წიგნები: „თეთრი ირემი“ (მოთხრობების, ნოველებისა და ლექსების კრებული), „ჭიაკოკონობა“ (საბავშვო ლექსების კრებული) და „ლექსად ნათქვამი ლეგენდები“. ავტორმა მოკლედ მიმოიხილა კრებულები, ბავშვებს უამბო მათი შექმნის ისტორიები, გაიხსენა სამწერლო ასპარეზზე გამოსვლის პირველი ნაბიჯები...
საბავშვო ლექსების კრებული „ჭიაკოკონობა“ ეძღვნება შვილიშვილს - ვანიკოს, რომელიც წიგნის გამოცემის პერიოდში ჯერ მხოლოდ 4 წლისა იყო.
სკოლის დირექცია მადლობას უხდის ბ-ნ ნუგზარს სტუმრობისათვის და უსურვებს საინტერესო შემოქმედებით წლებს.
ეს დღე დაუვიწყარი იქნება ჩვენი მოსწავლეებისათვის.
2022 წლის 28 ოქტომბერი სკოლა „ივერონში“ მიეძღვნა მოსწავლეთა ინტელექტუალურ თამაშს სახელწოდებით - „ტვინების ბრძოლა“.
სკოლაში დილიდან იგრძნობოდა ფუსფუსი, მზადება... შესაბამისად მოეწყო სათამაშო სივრცე - ბიბლიოთეკა...
ყველა გუნდს გამარჯვების მოპოვების დიდი სურვილი ჰქონდა...
თამაშში III- XI კლასების ყველა მოსწავლემ მიიღო მონაწილეობა. იყო დიდი ემოციები: წაგებული გუნდების წევრთა ცრემლები, ხოლო გამარჯვებული გუნდების წევრების უსაზღვრო სიხარული და ბედნიერება.
გამარჯვებული გუნდები არიან:
პირველი ასაკობრივი კატეგორია (III-V კლ) - გუნდი „შევარდენი“ (IV კლ);
მეორე ასაკობრივი კატეგორია (VI-VIII კლ) - გუნდი „საქართველო“ (VII კლ)
მესამე ასაკობრივი კატეგორია (IX-XI კლ) - გუნდი „რუბიკონი“ (XI კლ)
თამაში განსაკუთრებით ემოციური აღმოჩნდა გუნდისათვის „ლომები“ (VII კლ), რომლსაც მხოლოდ 1 ქულა დააკლდა გამარჯვებამდე; და ყველაზე პატარა მონაწილეებისათვის - გუნდებისათვის „ცეცხლოვანი არწივები“ და „ლომები“ (III კლ). მათ გასამხნევებლად და ცრემლების საპასუხოდ, დარბაზში გაისმა შეძახილები: „არწივები!!!“ „ლომები!!!“, რის შემდეგაც გუნდებმა „სძლიეს“ ემოციებს და განაგრძეს ბრძოლა გამარჯვებისათვის.
მიუხედავად ყველაფრისა, ეს დღე ყველასათვის დაუვიწყარი აღმოჩნდა. მოსწავლეები მოუთმენლად ელიან „ტვინების ბრძოლის“ მომდევნო სეზონს, რათა დაშვებული შეცდომები გამოასწორონ და გამარჯვება მოიპოვონ.
რამდენიმე კითხვაზე გუნდების მიერ გაცემული პასუხები მართებულად ჩაითვალა მას შემდეგ, რაც კომისიამ და თამაშის ერთ-ერთმა ორგანიზატორმა გააკეთა განმარტება.
გაწეული დახმარებისათვის, სკოლა დიდ მადლობას უხდის VI-XI კლასების ყველა მოსწავლეს, რომელთა დახმარებითაც წარიმართა თამაში. განსაკუთრებით უნდა აღინიშნოს კატო მერკვილიშვილის, გიორგი შარეიძის, ქეთი გობრონიძისა და ნინი ერისთავის თანადგომა, რომლებმაც ბოლომდე უერთგულეს „ტვინების ბრძოლის“ შიდასასკოლო ტურს და ხელი შეუწყვეს მშვიდი და ობიექტური გარემოს შექმნას.
VII კლასის მოსწავლის - ლუკა კობერიძის აქტიურმა ჩართულობამ და წარმატებამ „ტვინების ბრძოლის“ ოლიმპიადაში ყოველგვარ მოლოდინს გადააჭარბა - იგი 4 სერთიფიკატისა (3 - I ხარისხის, 1- II ხარისხის) და 3 დიპლომის მფლობელია:
სერთიფიკატები გადაეცა ქართულში, მათემატიკაში, ინგლისურსა და ზოგად ნაწილში წარმატებული ასპარეზობისათვის. დიპლომებზე კი ვკითხულობთ:
საქართველოს ჩემპიონი - 2022 წლის გაზაფხულის სეზონის გამარჯვებული;
რეგიონის ნაკრების გუნდის წევრი - 2022 წლის გაზაფხულის სეზონზე გუნდურად მიღწეული წარმატებისათვის;
2022 წლის გაზაფხულის სეზონის ფინალისტი, ოლიმპიადაში წერმატებული მონაწილეობისათვის.
ვულოცავთ ლუკას ამ წარმატებას! მომავალში კი ვუსურვებთ უფრო დიდ გამარჯვებებს.საკონტაქტო ინფორმაცია
