მიუხედავად 29 ნოემბრის ცივი ამინდისა, ივანე ჯავახიშვილის სახლ-მუზეუმში სტუმრობამ სოფ. ხოვლეში, საოცრად თბილ ატმოსფეროში ჩაიარა. ეს იყო გაგრძელება იმ ღონისძიებისა, რომელიც VIII კლასის მოსწავლეებმა დაახლოვებით ერთი კვირის წინ წარმოადგინეს სკოლაში, ბ-ნ დავით სართანიას სტუმრობის დროს.
სახლ-მუზეუმის დირექტორმა გულთბილად მიიღო ჩვენი მოსწავლეები, ექსკურსიამძღოლმა ბევრი საინტერესო ისტორიული ფაქტი გაგვაცნო ჯავახიშვილის ცხოვრებიდან და მისი მოღვაწეობიდან. დასასრულს, მოსწავლეებმა გადაიღეს სამახსოვრო ფოტოები.
ჩვენი მოსწავლეებისა და სკოლის ურთიერთობა სახლ-მუზეუმთან მხოლოდ ამით არ შემოიფარგლება - იქვე დაიგეგმა რამდენიმე საიტერესო პროექტი, რომელსაც ჩვენი მოსწავლეები გაზაფხულისათვის მოამზადებენ. ყოველივე ეს მიეძღვნება ივანე ჯავახიშვილის დაბადების დღეს (23 აპრილი). ისტორიის მასწავლებელმა ქ-ნმა იზა გარსენიშვილმა, რომლის ხელმძღვანელობითაც განხორციელდა და წარიმართა ეს პროექტი, ჩანაწერი დატოვა სახლ-მუზეუმის შთაბეჭდილებების წიგნში.
გამორჩეული დღე ჩვენს სკოლაში!
21 ნოემბერს სკოლას ესტუმრა ისტორიის დოქტორი, ივანე ჯავახიშვილის ცენტრის ხელმძღვანელი - ბატონი დავით სართანია.
შეხვედრა ჩატარდა ისტორიისა და გეოგრაფიის მოყვარულთა კლუბის ფარგლებში, რომელსაც ორგანიზება გაუკეთა ისტორიის მასწავლებელმა ქ-ნმა იზა გარსენიშვილმა.
სტუმარს მომზადებულები შეხვდნენ VIII კლასის მოსწავლეები - მათ გულდასმით დაამუშავეს და შეისწავლეს ისტორიული ფაქტები ქართული მეცნიერების ფუძემდებლის, დიდი ივანე ჯავახიშვილის ცხოვრებიდან. მოსწავლეთა პრზენტაცია გაცოცხლებული იყო საინტერესო სლაიდებით.
მოწვეულმა სტუმარმა მოსწავლეებს სიღრმისეულად გააცნო ის სირთულეები, რისი დაძლევაც მოუხდა ამ დიდ პიროვნებას ქართული მეცნიერების დასაბამისთვის, და რა გზა გაიარა მან საბოლოო მიზნების მისაღწევად.
ბ-ნმა დავითმა ისაუბრა ივანე ჯავახიშვილის ცხოვრების საინტერესო ეპიზოდებზე, პიროვნულ ღირსებებზე... და, კვლავ და კვლავ იმ დიდ შრომებზე, რომლის ნაყოფიცაა დღეს მსოფლიო მნიშვნელობის ქართველ მეცნიერთა მიღწევები.
ხელოვნების მოყვარულთა კლუბში 20 ნოემბერს შედგა ორი საინტერესო შეხვედრა. პირველი მათგანი დაეთმო II – III კლასების მოსწავლეებს, რომლებმაც იხილეს ქართული მულტიპლიკაციური ფილმი „წუნა და წრუწუნა“. ფილმის ჩვენებას წინ უძღვოდა საუბარი და განმარტებები იმის შესახებ, თუ როგორ იქმნება ანიმაციური ფილმი, ხელოვნების დარგის რომელი წარმომადგენლები ქმნიან მას, ვინ არის რეჟისორი, სცენარისტი, კომპოზიტორი, მხატვარი, დეკორატორი და ა.შ. მულტფილმის ჩვენებისას გზადაგზა ყურადღება გამახვილებული იყო პერსონაჟთა ტიპაჟებზე, მათ თვისებებსა და მუსიკალურ გაფორმებაზე.
IV-VI კლასების მოსწავლეები კი გაეცვნენ ყველასათვის საყვარელი მსახიობის სესილია თაყაიშვილის შემოქმედებას და იხილეს ქართული მხატვრული ფილმი „თოჯინები იცინიან“. მოსწავლეთა ინტერესი გამოიწვია XX საუკინის 60-იანი წლების თბილისის გარემომ - ქუჩებმა, სახლებმა, პერსონაჟების გარეგნობამ, ჩაცმულობამ, ყოფა-ცხოვრებისათვის დამახასიათებელმა ელემენტებმა და სხვა. სესილია თაყაიშვილთან ერთად მოსწავლეთა ყურადღება მიიპყრო ასევე სახელოვანმა მსახიობებმა - იპოლიტე ხვიჩიამ და ეროსი მანჯგალაძემ.
საკონტაქტო ინფორმაცია
