სასკოლო პროექტის ფარგლებში (თემა: კულტურული მემკვიდრეობის დაცვა - „ჩვენი საგანძური“), ა.წ. 26 მაისს X კლასი იმყოფებოდა ექსკურსიაზე ქვემო ქართლში, სადაც მონახულეს ღისრშესანიშნავი ისტორიული ძეგლები: VII საუკუნით დათარიღებული დმანისის სიონი, რომელსაც XIII ს-ის ორნამენტებითა და წარწერებით შემკული უნიკალური კარიბჭე ამშვენებს. მუზეუმ-ნაკრძალში წარმოდგენილია: შუა საუკუნეების ნაქალაქარი, გვიანბრინჯაო-ადრერკინის ხანის არქეოლოგიური ფენები და დმანისის ადრეპალეოლითური ძეგლი. ის მსოფლიომ გაიცნო, მას შემდეგ რაც არქეოლოგებმა გათხრებისას 1,8 მილიონი წლის ადამიანის ძვლების ფრაგმენტები აღმოაჩინეს. სწორედ დმანისელი ადამიანია პირველი ევროპელი.
აღმოჩენილი სხეულების ნაწილებისაგან მეცნიერებმა აღადგინეს გამოსახულება და მიიღეს ქალისა და მამაკაცის გამოსახულება, რომლებსაც სახელები მზია და ზეზვა შეურჩიეს. მოსწავლეებმა ნახეს დოკუმენტური ფილმი ტერიტორიაზე ჩატარებული არქეოლოგიური გათხრების შესახებ.
დმანისის ნაქალაქარი საქართველოს ერთ-ერთი უმნიშვნელოვანესი კულტურულ-ისტორიული ძეგლია. მუზეუმ-ნაკრძალი 1983 წელს დაარსდა და აქ 2345 ექსპონატია დაცული.
მოსწავლეებმა ასევე მოინახულეს სულხან-საბა ორბელიანის მუზეუმი ტანძიაში. სულხან-საბა ორბელიანი 1658 წელს სოფელ ტანძიაში დაიბადა. შთამომავლობით დიდგვაროვანი ფეოდალი იყო. მამა — ვახტანგი, ქართლის სამეფოს მდივანბეგი იყო; დედა — თამარი, ზაალ არაგვის ერისთავის ასული. სამეფო კარზე, რომელიც კულტურისა და განათლების ცენტრსაც წარმოადგენდა, ორბელიანი მეგობრობდა უფროს მამიდაშვილებთან, ვახტანგ V-ის (შაჰ-ნავაზის) განათლებულ ვაჟებთან: არჩილთან, ლევანთან, გიორგისთან (შემდეგში ქართლის მეფე გიორგი XI). ამ უკანასკნელს თავის სულიერ მოძღვრად მიიჩნევდა. მიიღო კარგი განათლება როგორც საერო, ისე სასულიერო დისციპლინებში. შემდეგში სამეფო კარზე მასვე დაევალა მომავალი ტახტის მემკვიდრის ვახტანგ ლევანის ძის (ვახტანგ VI) აღზრდა. 1698 წლის 18 მარტს, როგორც ჩანს, პოლიტიკურ მიზეზთა გამო, საბას სახელით ბერად აღიკვეცა დავითგარეჯის იოანე ნათლისმცემლის მონასტერში. 1703 წლიდან, ქართლის ახალი გამგებლის, ვახტანგ VI-ის დავალებით, ორბელიანმა დიპლომატიური მისიით იმოგზაურა სხვადასხვა ქვეყანაში, მათ შორის საფრანგეთსა და იტალიაში (1713-1716). 1724 წელს, როცა ვახტანგ VI-მ რუსეთს დააპირა გადახვეწა, მან მოსკოვში წინასწარი მოლაპარაკებისათვის ორბელიანი გაგზავნა, მაგრამ ხანდაზმულ მწერალს არ დასცალდა უკანასკნელი მისიის აღსრულება, იგი მოსკოვში მალე გარდაიცვალა. დაკრძალეს ვსესვიატსკოეში.
ბოლოს კი მოსწავლეები ესტუმრნენ V საუკუნით დათარიღებულ ბოლნისის სიონს. იგი, ისევე როგორც საერთოდ ადრინდელი ფეოდალური ხანის ქართული არქიტექტურა, გამოირჩევა ინტერიერის მკაცრი მონუმენტურობით.
ეს იყო ძალიან საინტერესო და სანახაობრივად დატვირთული დღე.
წიგნის მოყვარულთა კლუბის წევრებმა სასკოლო პროექტის ფარგლებში (თემა - „ჩვენი საგანძური“), იხილეს დოკუმენტური ფილმი „ადგილი, სადაც ილია მეორემ ბავშვობა გაატარა“. ეს ადგილია მცხეთის სამთავროს მონასტერი, რომელიც XI ს-ის პირველი ნახევრის საეპისკოპოს ტაძარს წარმოადგენს. ის აგებულია მეფე მირიანის მიერ აშენებული ტაძრის ადგილზე, რომელიც ბევრი ჩვენთაგანისათვის ერთ-ერთი გამორჩეული ადგილია. ფილმში მოთხრობილია საინტერესო ფაქტები ილია II -ს ბავშვობისა და ცხოვრების მომდევნო პერიოდის შესახებ. როგორც ცნობილია, სამთავროს მონასტრის ეზოში საეკლესიო პირების გვერდით დაკრძალულნი არიან საერო პირებიც. მათ შორის არიან: მწერალი და კინორეჟისორი - გოდერძი ჩოხელი, მსახიობი - ზინაიდა კვერენჩხილაძე, პოეტი - მორის ფოცხიშვილი და მწერალი - ლევან გოთუა.
საერო პირები ეკლესიის ეზოში იკრძალებიან კათოლიკოს-პატრიარქი, ილია II კურთხევით...
მოსწავლეებმა ასევე იხილეს მოკლემეტრაჟიანი დოკუმენტური ფილმი გოდერძი ჩოხელის შესახებ. იმ სოფელში, სადაც დაიბადა და გაიზარდა გოდერძი ჩოხელი, სკოლის შენობის ადგილას გაკეთდა მისი სახლ-მუზეუმი.
როგორც ცნობილია, გოდერძი ჩოხელი არის „მწერალი, სცენარისტი, კინორეჟისორი, ადამიანი, რომლის ნაწარმოებები და ფილმები ერთ მთლიანობას ქმნის და სიკეთისა და მშვენიერების ნიმუშია. როგორც იხსენებდა, კინოთი მაშინვე მოიწამლა, როცა პირველად მესამეკლასელმა მშობლიურ სოფელში ეკრანიდან თავისი სახელი გაიგონა - "გოდერძი, შვილო!" (ფილმიდან "ჯარისკაცის მამა"). კინოს სიყვარულმა თეატრალურ ინსტიტუტში მიიყვანა და მაშინვე გავრცელდა ამბავი, რომ მთიდან პატარა "ვაჟა-ფშაველა" ჩამოსულა და გამოცდაზე ფილმის გარჩევას ლექსად წერსო... პირველი გრან-პრი საკურსო ნამუშევარმა "ადგილის დედამ" მოუტანა. მოგვიანებით იყო "ვერცხლის ნიმფა" ფილმისათვის "ცოდვის შვილები". იმავე წელს მიიღო იაპონიის კინოფესტივალის ჟიურის სპეციალური პრიზი, პრიზები საუკეთესო სცენარისა და რეჟისურისათვის. გრან-პრი ანაპის ფესტივალზე "კინოშოკი" - ფილმისთვის "სამოთხის გვრიტები". 1998 წელს "ლუკას სახარება" საუკეთესო სცენარისთვის დააჯილდოეს. ყველა კინოსურათი თუ მოთხრობა მის მშობლიურ მხარეს, - გუდამაყარს ეძღვნება. ნაწარმოებებში ერთდროულად იგრძნობა სევდა და სიცოცხლის სიყვარული. "სიცოცხლე სევდა არის, ადამიანად ყოფნის ტკბილი სევდა," - წერდა ის... გოდერძი ჩოხელი სამთავროს დედათა მონასტრის ეზოში მიაბარეს მიწას...“
2025 წლის 4 დეკემბერს კერძო სკოლა " ივერონის" IX და X კლასების მოსწავლეები ესტუმრნენ ს. ჯანაშიას სახ. ეროვნულ მუზეუმს. შემეცნებითი ხასიათის ღონისძიების მიზანი იყო მოსწავლეებს რეალურ გარემოში განემტკიცებინათ წიგნიდან მიღებული ცოდნა. ექსკურსიამ ხელი შეუწყო ესგ-ით გათვალისწინებული მიზნების მიღწევას.
(ხელმძღვანელი: ისტორიის მასწავლებელი ქ-ნი ი. გარსენიშვილი)
სადამრიგებლო საათის ფარგლებში, VI-VII კლასების დამრიგებელთა ინიციატივით მოსწავლეებმა მოინახულეს „ბარამბოს“ საწარმო, სადაც მზადდება მათთვის საყვარელი - შოკოლადის, კარამელისა და ვაფლის პროდუქცია. ასევე მოინახულეს ნაყინის ჩამოსასხმელი დარბაზი, რომელიც სეზონიდან გამომდინარე, არ ფუნქციონირებდა. ბავშვებმა დიდი ინტერესით დაათვალიერეს ფაბრიკა, მოიხიბლენ მისი სიდიდითა და მომზადების პროცესით. საწარმომ ყველა ვიზიტორი დაასაჩუქრა ტკბლეულით, სიგელებითა და სტიკერებით.
